சென்னை: பேசுகிறவர்களின் உதடு அசைவுகளை வைத்தே புரிந்து கொள்ளும் ஆற்றல் கொண்ட மாணவி ஃபாத்திமா பானு, காது கேளாதோர் பள்ளியில் பிளஸ்-2 தேர்வில் முதலிடம் பெற்றார்.
சென்னை திருவல்லிக்கேனியை சேர்ந்த கார் டிரைவரான பி.எம். முஹம்மது அப்துல்லாஹ் – எம்.எஸ். நாகூர் மீரா தம்பதிகளின் மகள் ஃபாத்திமா பானு. இவர் பேச்சுத்திறன், காது கேட்கும் திறன் குறைபாடு உள்ளவர். இருப்பினும் முஹம்மது அப்துல்லாஹ் தன்னுடைய குறைந்த ஊதியத்தில் குடும்பத்தை நடத்திக்கொண்டு, மகளின் குறைபாடு தெரியாமல் சென்னை அண்ணாசாலையில் உள்ள லிட்டில் பிளவர் கான்வென்ட் மேல் நிலைப்பள்ளியில் அவரை படிக்கவைத்தார்.
உதடு அசைவுகளை வைத்தே மற்றவர்கள் பேசுவதை அறியக்கூடியவர்
வாய் பேச முடியாவிட்டாலும், காது கேட்கும் திறனை இழந்து விட்டாலும் மாணவி ஃபாத்திமா பானு தனக்கு எதிரே பேசுகிறவர்களின் உதடு அசைவுகளை வைத்தே அவர்கள் என்ன பேசுகிறார்கள் என்பதை புரிந்து கொள்ளும் ஆற்றலை பெற்று இருக்கிறார். இந்த ஆற்றலே அவர் பிளஸ்-2வில் அதிக மார்க் எடுப்பதற்கு துணை புரிந்தது.
பிளஸ்-2வில் பிசினஸ் மேக்ஸ் பாட பிரிவை தேர்வு செய்து தேர்வு எழுதிய ஃபாத்திமா பானு நேற்று முன்தினம் வெளியிடப்பட்ட தேர்வு முடிவில் 1000-க்கு 953 மார்க் பெற்று பள்ளியிலே முதல் மாணவியாக தேர்வு பெற்றார்.
தமிழில் 177 மார்க்கும்,
பொருளாதாரத்தில் 196,
வணிகவியலில் 198,
கணக்குபதிவியலில் 189,
பிசினஸ் மெக்சில் 193 மதிப்பெண்ணும் பெற்று இருக்கிறார்.
இந்த வெற்றி அவரையும் அவரின் பெற்றோர்களையும் மன மகிழ்ச்சி அடைய செய்துள்ளது.
பிளஸ்-2க்கு பிறகு பி.காம் படித்து, சி.ஏ.(ஆடிட்டர்) ஆக வேண்டும் என்பது தான் தனது லட்சியம் என்று அவர் தெரிவித்தார்.
ஆடிட்டராக விரும்பும் ஃபாத்திமா பானு:
முதலிடம் பெற்ற மாணவியை பள்ளி தலைமை ஆசிரியர் வசந்தி, `கட்டி பிடித்து வாழ்த்து தெரிவித்தார். பிளஸ்-2 தேர்வில் வெற்றி பெற்றுள்ள மாணவி ஃபாத்திமா பானு இன்னும் ஓராண்டு ஆங்கில கல்வியை அதே பள்ளியில் கற்க வேண்டியுள்ளது. இதன்பிறகு அடுத்த ஆண்டு (2011) அவர் கல்லூரிக்கு சென்று தன்னுடைய லட்சிய பயணத்தை தொடருவார்.