தமிழ்நாடு ஹஜ் கமிட்டி செயல் அலுவலர் அலாவுதீன் வெளியிட்டுள்ள அறிக்கை: இந்த ஆண்டிற்கான ஹஜ் புனித பயணம் மேற்கொள்ள விரும்பும் தமிழக முஸ்லிம்களிடம் இருந்து விண்ணப்பங்கள் வரவேற்கப்படுகின்றன.
இந்த பயணத்திற்கான தற்காலிக பதிவு விண்ணப்பங்களை, சென்னை நுங்கம்பாக்கத்தில் உள்ள தமிழக ஹஜ் குழு நிர்வாக அலுவலரிடம் சென்று, ஏப்ரல் 1ம் தேதி(நாளை) முதல் பெற்றுக் கொள்ளலாம் அல்லது www.hajcommittee.com என்ற இணையதளம் மூலம் விண்ணப்ப படிவத்தை நகல் எடுத்துக் கொள்ளலாம்.
பூர்த்தி செய்யப்பட்ட விண்ணப்பங்களுடன், பயணி ஒருவருக்கு 200 ரூபாய் பரிசீலனை கட்டணமாக பாரத ஸ்டேட் வங்கியில், மத்திய ஹஜ் குழு நடப்பு கணக்கில்(எண்:30683623887) செலுத்தி, அதற்கான வங்கி ரசீது நகலுடன் தமிழக ஹஜ் குழுவிடம், ஏப்ரல் மாதம் 30ம் தேதிக்குள் சமர்ப்பிக்க வேண்டும்.
சர்வதேச பாஸ்போர்ட் இருப்பின், அதன் நகலை விண்ணப்பத்துடன் இணைத்து அனுப்ப வேண்டும். பாஸ்போர்ட் வேண்டி விண்ணப்பித்திருந்தால், இருப்பிட முகவரி சான்றிதழை இணைக்க வேண்டும்.
பரிசீலனை கட்டணமாக அளிக்கும் பணம் திருப்பி அளிக்கப்பட மாட்டாது. இவ்வாறு அந்த அறிக்கையில் தெரிவிக்கப்பட்டுள்ளது.
நாடு முழுவதும் மக்கள் தொகை கணக்கெடுப்பு பணிகள் இன்று முதல் ஆரம்பம்
நாடு முழுவதும் மக்கள் தொகை கணக்கெடுப்பு பணிகள் இன்று முதல் ஆரம்பமாக உள்ளன. இந்த பணி ஓராண்டுகாலம் வரை நடக்கும். மக்கள் தொகை கணக்கெடுப்பில் முதல் நபராக ஜனாதிபதியும், அதற்கு அடுத்து துணை ஜனாதிபதியும் எடுத்துக் கொள்ளப்படுவார்கள்.மக்கள் தொகை கணக்கெடுப்பு பணிக்கு பொதுக்கள் நல்ல ஒத்துழைப்பை அளித்திடும்படி உள்துறை அமைச்சர் சிதம்பரம் வேண்டுகோள் விடுத்துள்ளார்.
டில்லியில் மாதாந்திர ஆய்வு அறிக்கையை வெளியிட்டு நிருபர்களிடம் உள்துறை அமைச்சர் சிதம்பரம் கூறியதாவது:.
நாடு முழுவதும் மக்கள் தொகை கணக்கெடுக்கும் பணி ஏப்ரல் 1ம் தேதி (இன்று) ஆரம்பமாகவுள்ளது. இந்த பணிக்கென ஏற்கனவே ஊழியர்கள் தேர்ந்தெடுக்கப்பட்டு போதிய பயிற்சி அளிக்கப்பட்டுள்ளது. இது தொடர்பாக ஏற்கனவே மாவட்ட கலெக்டர்களுடன் ஆலோசனை நடத்தியுள்ளேன்.
மக்கள் தொகை கணக்கெடுப்பு பணி ஓராண்டு காலத்திற்கு நடக்கும். ஒரு கோடியே 20 லட்சம் பேருக்கு அடையாள அட்டைகள் வழங்கவும் ஏற்பாடு செய்யப்பட்டுள்ளது.
மக்கள் தொகை கணக்கெடுப்பு பணிக்காக மத்திய அமைச்சரவை, 3,539 கோடி ரூபாய் நிதியை ஒதுக்கீடு செய்துள்ளது.முதன் முறையாக தேசிய மக்கள் தொகை பதிவேடு தயாரிக்கப்படவுள்ளது. இதுவரை நடைபெற்றதிலேயே மிகப்பெரிய மக்கள் தொகை கணக்கெடுப்பு பணிகள் நடைபெறவுள்ளதால் இதற்கு பொதுமக்கள் போதிய அளவு ஒத்துழைப்பு அளிக்கும்படி கேட்டுக் கொள்கிறேன்.
நன்றி: தினமணி