புதுச்சேரி: புதுச்சேரியில் ஏப்ரல் மாதம் முதல் விமானச் சேவை தொடங்கப்படும் என்று செய்தியாளர்களிடம் மத்திய திட்டத்துறை இணையமைச்சர் வி. நாராயணசாமி தெரிவித்தார். ஏப்ரல் மாதம் முதல் புதுச்சேரி விமான நிலையத்தில் இருந்து விமானங்களை இயக்க நடவடிக்கை எடுக்கப்பட்டு வருகிறது. 50 பயணிகள் பயணம் செய்யும் வகையிலான விமானம் முதலில் இயக்கப்படும்.

இதற்காக விமானங்களை இயக்கத் தனியார் நிறுவனங்கள், அரசுடன் பேச்சுவார்த்தை நடத்தி வருகின்றன. இங்கிருந்து பெங்களூர், கொச்சி, கோவை ஆகிய நகரங்களுக்கு விமானப் போக்குவரத்து தொடங்கப்படும். பயணிகளின் எண்ணிக்கை மற்றும் விருப்பத்தின் அடிப்படையில் சென்னைக்கும் விமானப் போக்குவரத்து தொடங்க நடவடிக்கை எடுக்கப்படும் என்றார் மத்திய திட்டத்துறை இணையமைச்சர்.

வாஷிங்டன்: இதை அமெரிக்க அரசு மற்றும் சர்வதேச கல்விக்கான அமைப்பும் இணைந்து வெளியிட்ட அறிக்கையின்படி அமெரிக்காவில் உள்ள பல்கலைக்கழகங்களில் படிக்கும் இந்திய மாணவர்களின் எண்ணிக்கை தற்போது ஒரு லட்சத்தை தாண்டியுள்ளது.

அமெரிக்க பல்கலைக்கழகங்களில் அதிகளவில் படிக்கும் வெளிநாட்டைச் சேர்ந்த மாணவர்கள் வரிசையில் இந்தியா தொடர்ந்து கடந்த 8 ஆண்டுகளாக முதலிடம் வகிக்கிறது. கல்விக் கட்டணம் மூலம் அமெரிக்க பொருளாதாரத்தில் கடந்த ஆண்டு மட்டும் இந்திய மாணவர்கள் ரூ.14,100 கோடிக்கு பங்கு வகித்தனர். மொத்த வெளிநாட்டு மாணவர்களின் பங்கு ரூ.93,660 கோடி. அதிலும், அமெரிக்காவில் நிதி நெருக்கடி தீவிரமாக இருந்த நேரத்தில் வெளிநாட்டு மாணவர் எண்ணிக்கை உயர்ந்தது குறிப்பிடத்தக்கது.